आउँदो असोज २७ गते अर्थात् १४ अक्टोबर, शनिबार महानगुरू ४१ औँ साक्या गोङ्मा ट्रीछेन् रिन्पोछलेले नेपालमा दुर्लभ महाभिषेक (वाङ्छेन) प्रदान गर्ने कार्यक्रम रहेको छ । ४१ औँ साक्या गोङ्मा ट्रीछेन् रिन्पोछे अभिषेकका लागि आइतवार भारतबाट नेपाल आइसक्नु भएको छ । उहाँले महाकरुणा आर्यअवलोकितेश्वरको महाभिषेक काठमाडौंको चुच्चेपाटी, बौद्धस्थित तारागाउँ म्युजियमको खुलाचौरमा प्रदान गर्दै हुनुहुन्छ । रिन्पोचेले प्रदान गर्ने अभिषेकको बारेमा जानकारी दिन सोमवार आयोजक व्योम कुसुमा बुद्धधर्मसंघले बौद्धस्थित उत्पला क्याफेमा पत्रकार सम्मेलन गरेको छ ।
आयोजकका अनुसार, यो भारतवर्षीय महासिद्ध श्रीमद्मैत्रियोगी (जगन्मित्रानन्द÷मित्रजोगी) परम्पराको असाधारण आर्यअवलोकितेश्वरको महाभिषेक विश्वशान्ति, सद्भाव, भाइचारा र मानवता’का लागि सकारात्मक उर्जा र सद्भाव प्रवाहका लागि गर्न लागिएको हो । यस महाअभिषेकमा नेपालका तराई, पहाड र हिमाल तीनै भेगमा अनुयायीहरुको ठूलो सहभागिता हुँदैछ ।
संसारभरका मानव जातिमा शान्ति, सद्भाव र मानवताको सन्देश प्रवाह गर्ने उद्देश्यले हुन गइरहेको यो महाअभिषेकमा जो कोहीले सहभागी भई पूण्य प्राप्त गर्न आयोजक संस्थाले आग्रह गरेको छ ।
