ड्रुक अमिताभ माउन्टेनमा आयोजित भव्य महाकाली छोग्बुम धार्मिक अनुष्ठान विभिन्न पूजा, सशक्तीकरण प्रवचन तथा धर्मनृत्यसहित सम्पन्न भएको छ।
अनुष्ठानको अन्तिम दिन बिहान भिक्षुणीहरूले प्रार्थना गरेका थिए। त्यसपछि क्याब्जे ड्रुब्पोन खाम्ताक रिन्पोछेले मौखिक धर्मोपदेश तथा परम्परागत शिक्षा प्रदान गर्नुभयो। यसै क्रममा ग्याल्वा दोखाम्पाले ‘ओसन अफ मिन्स अफ अकम्प्लिसमेन्ट’ (Ocean of Means of Accomplishment) अन्तर्गत सर्वसाधारणका लागि अन्तिम चरणको अभिषेक प्रदान गर्नुभयो।
दिउँसो आयोजित भव्य महाकाली गणचक्रमा ग्याल्वा दोखाम्पा, क्याब्जे ड्रुब्पोन खाम्ताक रिन्पोछे, श्रद्धेय सङ्गा देन्येन जाम्छो, कुरेजामस्थित ङाग्द्रा दोर्जे छोगारका पूर्व दोर्जी लोपेनलगायत श्रद्धेय टुल्कु, लामा, भिक्षु तथा भिक्षुणीहरूको सहभागिता थियो।
साँझ भिक्षुणीहरूले प्रस्तुत गरेको धर्मनृत्यसँगै महाकाली पूजा तथा पुण्य समर्पण प्रार्थना गरिएको थियो। यससँगै भव्य महाकाली छोग्बुम धार्मिक अनुष्ठान औपचारिक रूपमा समापन भएको हो।
बौद्ध वज्रयान परम्परामा आधारित यस्ता धार्मिक अनुष्ठानमा अभिषेक, धर्मोपदेश, सामूहिक पूजा तथा पुण्य समर्पणमार्फत धर्म अभ्यास र आध्यात्मिक साधनालाई महत्त्व दिइन्छ।
