काभ्रे, भदौ २ गते (१८ अगस्ट २०२६) — काभ्रे जिल्लाको तेमाल गाउँपालिका–५ स्थित तेमाल शान्ति ध्यान केन्द्रको उद्घाटन तथा रब्ने (प्रतिष्ठा) समारोह भदौं २ गते मंगलवार परमपूज्य ४३औँ साक्या ठिजीन ज्ञान वज्र रिन्पोक्षेको प्रमुख उपस्थितिमा सम्पन्न भएको छ।
खेन्मो आनी माया तथा केन्द्रका सदस्यहरूको अनुरोधमा स्थानीय समुदायमा धर्म अध्ययन, चिन्तन तथा ध्यान अभ्यासलाई प्रवद्र्धन गर्ने उद्देश्यले निर्माण गरिएको उक्त केन्द्रलाई रिन्पोक्षेले निर्माणको प्रारम्भिक चरणदेखि नै आध्यात्मिक मार्गदर्शन तथा आर्थिक सहयोग प्रदान गर्नुभएको थियो।
समारोहका अवसरमा रिन्पोक्षेले केन्द्रको औपचारिक उद्घाटन तथा रब्ने (प्रतिष्ठा) सम्पन्न गर्नुका साथै उपस्थित श्रद्धालुहरूलाई धर्मदेशना प्रदान गर्नुभयो। साथै, वज्रकिलय कागो आशीर्वाद प्रदान गरी श्रद्धालुहरूलाई दर्शन दिनुभएको थियो।
स्थानीय बासिन्दा, भिक्षु–भिक्षुणी तथा विभिन्न क्षेत्रबाट उपस्थित श्रद्धालुहरूको सहभागितामा सम्पन्न कार्यक्रम श्रद्धा, भक्ति र उत्साहपूर्ण वातावरणमा सफलतापूर्वक सम्पन्न भएको आयोजकले जनाएको छ।
